الرئيسيةالمجلهاليوميةس .و .جبحـثقائمة الاعضاءالمجموعاتجروب منتديات ابو هيفالتسجيلدخولالتسجيل

شاطر | 
 

 قال .. حقوق المرأة .. قال .. على لسان وحدة مكاوية

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ميدو مشاكل
.::..::. الاداره .::..::.
.::..::. الاداره .::..::.


ذكر تاريخ الميلاد : 14/05/1983 اعلام البلااد : العمر : 33
تاريخ التسجيل : 11/06/2009 الخنزير

مُساهمةموضوع: قال .. حقوق المرأة .. قال .. على لسان وحدة مكاوية   السبت أبريل 10, 2010 11:06 pm

قال .. حقوق المرأة .. قال


ما
يرفع ضغطي شَي زَي كلمة حقوق المرأة .. وبالذات في السعودية ..وهادي
المشكلة طلعت من متى؟ بعد 11 سبتمبر .... سبحان الله .. فجأة كده صحيوا
وقالوا: وهـ ياندامة .. إيش هادا؟ أتْـرِنُّو إحنا لنا حقوق؟! مادام كده
.... الإنتخابات البلدية ليه ما نشارك فيها؟ وليه ما نروح هناك ونرقع
بالصوت؟

يا أختي حلال عليكم البلدية كلها .. يعني إيش تبغوا تسووا؟
تحطوا ضوابط إصدار الرخص لمحلات الحلاقة مثلا؟ والا تناقشوا سفلتة الشارع
اللي يودي على بيت أم إبتسام؟ والا ليه الشارع الفلاني ما فيه كوفيرة
مغربية وكل اللي فيه مصريات؟ يا أختي ريِّحي راسك .. اذا كثير من الرجال
ما سوُّوا حاجه ... بالله عليكي حتسيبي بيتك وعيالك وشغلك ... عشان تناقشي
مشروع إنتخابي؟ هادا من تمام الفضاوه

طيب قولوا لوحْدَه زواج أختها
الليلة: بلاش تروحي للكوافيره اليوم يا مدام وتعالي نناقش حقوق المرأة أو
نحضر المجلس البلدي و نتخذ قرارات مهمة .. وأترك لكم جوابها .. إيش يكون

أما
عن حقوق المرأة في السعودية .. فيا ستي.. الست هنا لها حقوق وواجبات ما
تتنازل عنها. مثلا: في بلدان كثير عربيه وأوروبيه تلاقي شحط زي الثور جالس
في الباص ...وقدامه وحده في الشهر التاسع واقفه على رجولها وشايله طفل
تاني على كتفها ... إن الشحط يتحرك؟ .. أبدا...إن التور يحس؟ .....لايمكن.
لكن هل يمكن يحصل هادا في السعودية؟ أبدا .. واللي يبغى يجرب ....الطريق
قدامو .... يا عمي العملية كلها دلع حريم في دلع حريم .. رايح أعطيكم بعض
الأمثلة وقولوا لي مين اللي آخِد حقُّو بالكامل وزياده؟ وهل عندنا المرأة
متساوية مع الرجل ... والا هي أحسن مِنُّو؟


قال .. حقوق المرأة .. قال


منظر عام
رجال
محترمين واقفين أمام صراف في بنك ... وتِجي أختنا في الله(اللي يقولو إنها
مهضومة الحقوق) تتقدم للصراف مباشرة ولا على بالها من الطراطير اللي
واقفين من ساعات .. وبعضهم مستأذنين من عملهم. طيب ليه ما توقِّف تِمسك
سِرا ورا عشرين بنغالي... وثلاثين باكستاني... وخمسين سعودي... واثنين
معقبين معاهم شوية فواتير مقاس إكس لارج ... وإذا أحد كلمها وقال لها
أتفضلي يا أختي تردعليه وتقول:لا، معليش. المرأة زَيّ الرجال .... خليني
في الطابور ... زَيِّي زيكم؟! ... ليش ما تقول كده؟! ... والا هي تماحيك
وبَس!ونفس المنظر فيالجوازات .. والأحوال .. والتأمينات..ويقدر أحد ....
يقول إنه أنا مين .... ويفتح فمُّه؟...على طول يسمع العبارة الشهيرة .. (
عيب عليك ..إنت ما تستحي؟ .. هذه حرمة...إنت ما عندك أهل!)) ..ويضطرالراجل
إنُّه ينكتم ويسكت..لا وكمان المرأة تشفع للراجل جوزها عشان يتقدم على
الرجال الباقين. في المطار .. مثلا .. ما تشوفهم يطلِّعوا العوايل أوَّل
.. وبعدين بقية الركاب؟

قال .. حقوق المرأة .. قال


اقتصاديا
شوف
الراجل... السبع... الغضنفر... المفتري...له ثوبين أوثلاثة في السنة ..
يروح بيها العمل، ويحضر بيها عزايم وزواجات، ويقابل بيها كبار المسؤولين،
الخ، الخ، الخ.والمرأة بسلامتها ... بقيمة أدوات مكياجها فقط... تقدر تفتح
محل خياطة رجالي محترم.. ويا ريت تحط من مكياجها في البيت ... لأ. دا بَس
للخروج... وقيمة صبا عروج والا علبة بودره تساوي قيمة جوال جوزها ...
وكمان ازيدك من الشعرقصر.. مو بيت... من حقوقها فستان لكل فرح... و
مكياج... وكوافيرة...وجزمة ...وشنطه.. وكمان خُدوا هادي ... سابع بنت عمي
...ملكة أخت جارتنا ...ولازم هديه... واللطخ يدفع ....مو مهم الفلوس جات
من فين ...المهم يدفع ... والدنيا ممكن تنقلب على الراجل واللي خَلَّفوه
علشان موضوع (مهم وحيوي) زي كده...


قال .. حقوق المرأة .. قال


نفسيا
الزوج
مطالب يكون أربعة وعشرين ساعة رومنسي ومبتسم، ولا يبقى جلف وإبن ستين في
سبعين.ويعني إيه عنده مشاكل في العمل؟! والا أقساط متأخره؟! والافواتير؟!
والا مقاضي ما يعرف كيف يجيبها؟! مو مهم .. واجب عليه إنه يرجع من العمل
للبيت مروِّق ومبسوط وبَس .. كإنه كان في شرم الشيخ مصيف مع نانسي عجرم ..
((مجرد مثل .. تف .. بره وبعيد)) ... والست بسلامتها من ساعة ما يرجع من
عملو ... وقبل ما يفصخ حوايجو: شوف بزورتك (لاحظوا .. بزورتك) طفَّشوني
... إيش رأيك نغير غرفة النوم؟ التلفون ما فيه حراره .. جاتني رساله على
الجوال يقولوا الفاتوره طلعت .. أَلحق سّدِّدو قبل ما يوقفوه عن الخدمه
... ... ... ... ومع هادا كُّلو ..لازم يبقى رومانسي

بينما هي وبكل
سهولة تصحى بسلامتها في الضُّهر...وتجد الكارثة الكبرى....يوه ...ما عندنا
صلصه...وبكل رقة تتصل...ألو ألو ...أبو خالد موجود؟ ممكن أكلمه لو سمحت؟
ألو ... إيوه... أنا .. حتكون مين يعني؟... المهم .. جيب معاك غدا ...
ماهو إنت يا فالح نسيت تجيب صلصه معاك أمس. ولإنه موفاضي.. و قرفان من
العمل.. يصدق المسكين إنه هو إللي نسي ويقول بكل شجاعة ..... طيب

وفوق
هذا كله آخر السنه: طفشانه ...فين حتودينا ....والله بنت خالتي راحت
أمريكا .. وبنت عمي ما تصيف إلا فْ أوروبا...يا عيني عليناإللي ما نروح
غير يا مصر ... ياسوريا... والسنة اللي غيَّرنا فيها .. رحنا ماليزيا

وفي
رمضان: تعبت ...أوف ....إنت داري عن حاجه؟ أنا أبغى خدامة... أنا
خلااااااااص ..ومن ثالث يوم رمضان ...مقاضي العيد من جده ....أختي جابت
ملابس لها ولعيالها..إيش أقولَّك بس ... وخُد مشاوير لليييييييييييل ...
والراجل المسكين لما ينزل السوق مع مرته ما يقدر يشتري ولااااا شَي لنفسو،
لأنو طول الوقت ماشي وراها من دكان لدكان، وشايل زنابيل إلين ما كتفو
يتخلع. وهي تطالع فيه وهو يتطوَّح من ثقل الزنابيل .. ولا تقول لُو فزعه
.. حتى لو بالكِدِب. وآخرتها بعد ما يرجع البيت تقول لو إنها لِسَّه ما
أشترت ملابس العيد!!!!!! وإذا فكَّر ينزل السوق لحالو عشان يشتري شي لنفسو
... على طول يكون مشبوه .. إيش ينزلك لوحدك وسط الحريم؟..طيب إنت مو كنت
معايا في السوق .. أحد قال لك لا تشتري؟
قال إيه؟ .. حقوق المرأة.

قال .. حقوق المرأة .. قال

شرعا
المرأة
لها حظ من أبوها ..وحظ من زوجها .. هادا غير أمها .. وأخوانها ..
وأبناءها.. والراجل مطالب إنو هو اللي يصرف عليها مهما كان عندها فلوس.
وثانيا:
الرجال لازم يروحوا للمسجد خمس مرات في اليوم .. جمع وجماعات .. حر
وبرد..ليل وصبح..لازم يروحوا ... بينما الست تصلي تحت المكيف .. في غرفتها
.. وأجرها زي الرجال تماما ...ياعيني ...يا عيني..والله الإسلام أعطاكم
كتير .... وياريتو يِبان فيكم.

في العمل
ياعيني دكتورات.. وصيدلانيات.. ومدرسات.. وموظفات بنوك.. وغيره.. (وبنفتح مشاغل.. ومطاعم.. وكويفيرات..) ايش بقي ندخل الجيش؟


قال .. حقوق المرأة .. قال


إجتماعيا
الست
كل أسبوع تخرج عند صاحباتها وما ترجع إلا متأخره .. وطبعا جوزها هو اللي
يوديها ويجيبها .. (يعني تبغاني أروح مع السواق في هادا الليل؟!) ..
وسعادتها ما تبدأ تتمكيج وتسرح شعرها إلا بعد العِشا .. وكل شويه تقول
:خلَّصت ...وهي ما سوت شي لِسَّه .. والراجل الغلبان جالس على أعصابو
يستنيها تخلص.. أخيرا تقول لُو: وي! إنت ما نزلت السياره؟ .. وَي .. هيا
عشان لا نتأخر. المسكين يجري في الدرج (عشان ما يأخرها) ... ويشغل السياره
.. ويستَنِّي بسلامتها مو أقل من ربع ساعة حتى تشَرِّف

وطبعا ممنوع
يقول لها: (إيش أخَّرِك؟) والا يا ويلو .. وبعد ما يوصلها .. يستحيل يغتنم
الفرصه ويروح هوَّ كمان لأصحابو إلين هي تخلص سهرتها.. (وَه! كيف تروح؟!
ومين يقعد مع البزوره؟).. والماكياج اللي حطتو للستات يتمسح نصو بالطريق
.. والباقي بعد ما توصل البيت .. يعني الرجَّال ما يلحق يشوف مِنُّو شي

وإذا
بعد شهر أو شهر ونص جات لو عزيمه في زواج ... أو فكر يخرج ليله مع أصحابو
.. وبلَّغها من بدري عشان ما ترتبط بموعد مع صاحباتها في نفس الليله وتخرب
عليه .. هو إنت ما تعرف تِقِر في البيت؟ كل ليله معزوم؟ شوفي يختي الراجل
.. ما كإنُّو عندو بيت ولا بزوره

لكن مع دا كُلُّو .. برضهم الستات أحيانا نحس إنهم غلبانين

يمكن عشان قلبنا طيب

_______________ التوقيع _______________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
the_otherface
ابوهيف عامل قلق
ابوهيف عامل قلق


ذكر تاريخ الميلاد : 26/05/1983 اعلام البلااد : العمر : 33
تاريخ التسجيل : 04/07/2009 الخنزير

مُساهمةموضوع: رد: قال .. حقوق المرأة .. قال .. على لسان وحدة مكاوية   الأحد أبريل 11, 2010 4:03 pm



ثانكسسسسسسسسسسسسسسسسسسسسسسسسسسسسس

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ThE_ScoRpioN23
ابوهيف بيكبر
ابوهيف بيكبر


ذكر تاريخ الميلاد : 27/02/1990 اعلام البلااد : العمر : 26
تاريخ التسجيل : 15/06/2009 الحصان

مُساهمةموضوع: رد: قال .. حقوق المرأة .. قال .. على لسان وحدة مكاوية   الأحد أبريل 11, 2010 4:14 pm



مرسي يا جميل على الموضوع وربنا يخليك لينا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قال .. حقوق المرأة .. قال .. على لسان وحدة مكاوية
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات ابو هيف :: «®°·.¸.•°°·.¸.•°™ شبابيات ™°·.¸.•°°·.¸.•°®» :: .::..::. شـــباب × بنات .::..::.-
انتقل الى: